« Pourvoyeur » : arotakan kaskina wiec ka aitotisketc
« Pourvoyeur » ka itakaniwok awik ka otinimaketc kaskina ke ici apatanik « pourvoirie » ka ici arotakaniwitc. Kotc e 4 tipahikanearik e wapanik nac 11 tatotipahikan e tipiskarik pa otamirowok aka kitci notepariritci kekociciriw omantemiwaw mocak tca kitci mikawiritci e ki micta mirwatcitaritci irikik ka ki pa aitacikeritci neta.
Kaskina wiec aititoskew naha « pourvoyeur ». Kipe pipona otamiro osam kipe pipona aci cenikatew nihi « pourvoiries ».
Pakoneparakaniwiw miskomi kitci ki wepahapaniwok, 2013
Kaskina wiec irapatisiw, mirokanew maka acitc micta mackowisiw. Manikew, ocitaw ka pikockarik mikiwamiskak, meskanariw mitaw. Pa witcewew notcimik nihi ka pe nta natosweritci, kecpin tca e nipahosweritci witcihew nihi ka ki nipatasoritci. Pa towikahikew, awotcirew asinica e meskanaketc, ocitaw taci ke ici amiritci namesa. Mitcetc kekociciriw kackitaw e aitotisketc.
Mictikw e kohwakaniwitc, 2017
Kitci kicteritcikaniwok, 2013
Enko naha « pourvoyeur » ka mitatc tan ke aitotiskaniwonik neta « pourvoirie ». Wir ka mihatc kaskina arotakana, wir kaie ka oreritak ke aitotcikaterik kitci metowehatc omantema. Mitowiriw ka kokwetcihitonaniwok e wepahapaniwok. Kaskina awiriw kicterimew kaie wir tca kaskina awiriw kicterimiko.
Namiew naha iriniw wircike ka pamatisitc notcimik. Otcitakotc wi miro mihew omantema ka sakitaritci notcimik e pa aitacikeritci.