Kekwan ni pactonekiwam ka icinikatek ?
Nictam « clubs privés » ka icinikatek ki takono ota Québec askik epwamoci pactonekiwama (pourvoiries). Epwamoci 1970 tato piponikak ki kiskeritetai a awocimec 2 200 e tatikipan « clubs privés » e ici natoswaniwokipan acitc wepahapaniwokipan E micta mitcaskweak acitc e micta sakihikaniskak micta mitcetiwok awesisak acitc namesak. Ekoni wetci ki nita pe icatcik pactone askik iriniwok e micta misikitatcik. Wiec 1970 ka tato piponikak, mitcet wepahape iriniwok acitc natoswe iriniwok ota Québec ka taciketcik ki koski nataweritamok otaskiwaw matci kaskina awiriw kitci ki pa icaritci pactonekiwamik.
Nisawinaniwon kitci nta wepahapaniwok « L’empire club », 1947
1978 ka tato piponikak ki maninikatew « clubs privés » ka icinikatekipan, « pourvoirie » tca ki icinikatcikatew enko tca ni nihi anotc pactonekiwama ka itaniwok. Nama ni mitowi « ZEC » kekotc « parc nationaux » ka icinikateki, nehi maka « entreprises privées » ni itaniwon.
Weckatc pactonekiwam
Kinec irikik tepirak e natoswaniwok acitc e wepahapaniwok irapatanopan pactonekiwama. Nicwekw icinakonopan pactonekiwama. Peikw nihe PADE icinikatepan (pourvoiries à droits exclusifs). Tepirak niki ka ki masinahotisowakopanen acitc kice okimawa kitci kicikasotcik matci icapanak neta. Kotak tca nihe PADNE icinikatepan (pourvoiries à droits non exclusifs), matci kaskina awik kata ki icapan neta pactonekiwamik matci kaskina wiec kitci ki aitotiskewaspan. Itactew irakonike masinahikanik 78.1 ka tatosinatek irakonikewin: kitci manatcihakiniwitcik awesisak aka kitci tcakohakaniwitcik. Kicikasopanak aric kitci ki taciketcik neta, kitci atoskectowakaniwitcik acitc ke irapatcitatcik kitci awihakaniwitcik kotc e aitotiskewakopanen: kitci ntohotcik, kitci wepahapetcik, kekotc kitci metowehotisotcik.
Anotc pactonekiwam
Mitcet pactonekiwama nac notcimi nipewokomok ki iti irapatano. Nama tepirak kitci ki natoswaniwok acitc wepahapaniwok ki irapatcitakaniwon. Papitoc aitikitakonipan aniki otci ka icawaspan e nta notciminiciwaspan mitowi witcicanak mamo, okwimesinanak, aniki ka ki wikimitotcik, aniki aka ka miro matisitcik (mitowi ka niponesitcik oskatiwak aka ka ki motetcik).
Ota Québec askik awocamec 675 tatino pactonekiwama. Ota Mauricie askik 75 awocamec tatino. 400 irikik tatino ka ki mamowinitotcik neta « Fédération des pourvoiries » Québec askik ka takoki. Ota tca Mauricie askik 50 awacomec apiwok neta « association des pourvoiries » ka icinikatek.
Aci a kaki nta wepahapan « réservoir Gouin » 2015